文、圖:網主

93-95年間一次巴士迷世界活動,參觀九巴訓練學校,仲可以喺師傅指導之下揸巴士,十幾歲人車都未揸過就可以揸巴士,仲要係日日都坐嘅珍寶(雖然坐港島嘅為主),一世難忘

當日活動攪手話若果夠某個歲數的話就可以揸,我唔夠所以無得玩,只能夠揸聰明巴士!朋友話長期三波係咁繞圈好好玩!後尾攪手好好放埋俾我地玩,嘩,心中無言感激!

唔識揸車的話其實唔太知自己做緊乜,總知師傅話行就行,扭軚就扭軚,好記得去到近出入口嗰邊度牆,心諗就快到牆喎仲唔扭軚,師傅話唔好扭住,再行前啲仍然話唔好扭住,嘩就快埋到去撞嘞喎然後佢先至叫扭,而家諗番其實係仲有好多位…..

一波起步,轉二波就一定啦,跟住師傅叫轉三波,吓我十幾歲人仔你叫我轉三波,我話吓?佢話你轉啦唔駛驚,咁當時部車其實唔快,係低轉數轉三波而唔係日日睇司機打波子扯到行高音轉三波,佢其實想我玩拖波,咁就試咗人生入面第一次三轉二,嗚嗚聲好親切,日日聽….

揸完仲同同組嘅另外幾個人同師傅合照,好似學完考埋牌咁,其實只係揸咗一陣!雖然只係玩咗兩三個圈,但已足夠記住成廿幾年,而家就算俾部珍寶我都搵唔翻嗰種感覺

而家車靚咗但要跟規矩做,呢種安排當然唔會再發生

曾喺電視節目「巴士情真」中接受訪問嘅傅先生當日都喺度協助活動進行,我初時只能玩聰明巴士,記得佢好緊張咁叫我唔好俾油住,因未放手制,後尾諗番當然明佢點解咁緊張,而家唔係中巴司機上斜要俾住油放手制咁彈住起步,咁樣俾油又鎖住部車就好快俾我呢啲唔識嘢嘅?仔玩完…..

多謝收睇!