ME37(DG5717)於2002年5月退役後被購入作私人收藏,並於一段時間後被翻髹成九巴為平治巴士特別設計的斜紋線條。相片由香港古典交通會提供。

ME37ME37-2

下圖:此車曾參與其中一屆巴士大集會。(石春大師攝)

ME37_B_MASTER ME37_C_MASTER ME37_MASTER


車主曾接受蘋果日報訪問,並於2004年8月3日刊出,當時仍未翻髹回斜線款式。

瘋狂巴士迷買真巴士遊車河

【本報訊】手工精緻、造型逼真的模型巴士,已不能滿足部份巴士迷的慾望。不少年輕巴士迷為追求真實感,近年都改為收集巴士車牌、座椅、軚盤、錢箱等舊零件,令退役巴士頓成「搶手貨」;有瘋狂巴士迷甚至向巴士公司購入真正的舊巴士,翻新後與志同道合的好友一起在公路上「遊巴士河」。 記者:雷子樂

03ls2p1new
巴士迷鄭先生與友人購入多部退役巴士,平日放在元朗的車場,偶爾一起「遊巴士河」。 被訪者提供圖片

「揸住㗎巴士出街,真係會有人截車㗎!不過我哋唔可以埋站,感覺好得意。」親自駕駛巴士在公路飛馳,相信是不少巴士迷夢寐以求的心願。

「巴士工房」的負責人鄭先生表示,數年前他與友人合資向中巴及九巴購買了數部舊巴士,每部售價由七千元至萬多元不等,他本身又持有有關駕駛執照,故能成為其中一位願望成真的幸運兒。

位於葵涌一間工廠大廈內的「巴士工房」,是本港其中一間出售舊巴士零件的店舖,開業近五個月,已吸引不少學生「巴士迷」光顧。「工房」的陳列室內,全是布滿灰塵的巴士號碼、終點站黑膠牌、巴士車牌、車廠水牌、巴士座椅、俗稱「乳豬紙」的路線圖等舊配件,一些年約十多歲的中學生,都愛到這裡「尋寶」,記者現場所見,像巴士車牌這類體積細小的舊零件,較受巴士迷歡迎。

03ls2p2
這些盤、錢箱,全在舊巴士拆下重新裝置;巴士工房負責人鄭先生表示,二十歲以下的中學生,較喜愛收集巴士舊零件。 司徒世華攝

買賣均不犯法

這些舊零件售價約由數十元至一百元不等,遠較動輒二、三百元的巴士模型便宜。「巴士工房」另一負責人 Jacky表示,收集巴士零件的風氣早在九八年中巴結業時萌起,吸引了一群十二至二十歲的年輕人;三十歲以上的巴士迷則只愛收集價錢較高的模型巴士,對真實的零件沒太大興趣。

其實,巴士公司每年都會登報出售已「退役」的巴士,巴士出售前多會拆掉波箱、引擎、錢箱等配件。新巴及九巴發言人都表示,所有退役出售的巴士,已拆去了公司有需要保留的零件。「劏車場」一般只會將巴士的廢鐵再轉售,其他餘下的配件多當垃圾棄掉。

Jacky表示,這些舊零件全在新界的數個「劏車場」搜購,由於已不屬於巴士公司的財物,售賣或購買都不會犯法。

03ls2p3
路線牌及車牌等舊配件,大受年輕巴士迷歡迎。 黃賢創攝

話你知:私家巴士只可載四人

運輸署發言人表示,根據香港法例,任何人持中型或重型貨車的有效駕駛執照,即有權駕駛的士、小巴或巴士;但巴士迷駕駛一輛已退役的巴士,需在車身指定位置貼上暫停載客的字樣,除司機外,巴士最多只可載客四人。換言之,合資格的巴士迷購入真巴士後,可載同四名同道中人「遊巴士河」。

網主註:車主曾將ME37開到巴士工房樓下讓人拍照,估計當時約為2004年。(下圖:DA32EM4321攝)


另一篇來自2008年5月28日出版的Face雜誌auto express:

o靚仔私玩80’s雙層巴

「細個我鍾意揀巴士坐,尤其行新界線部O350『ben屎』,就算等多班車我都等,因為由元朗出九龍,部車實追到前面班車!」

「呢部車以前叫巴士車王,聽個名都知勁,佢85年香港落地已經可以開到超過90km/h(同期巴士80km/h),同期根本冇對手。」

getimage1

各自擁有1部O305退役巴士的阿棋和Tony說。

原來唔需要同巴士公司打工,都一樣可以駕巴士,兩個二十來歲的後生仔,跳上私家巴士就可以隨時出發,一個人駕一部可載123人的巴士四圍捐,比你開一部300萬兼得2個位的F430還要dream!

只得21歲的阿棋(左)和24歲的Tony(右),年紀輕輕就各自擁有一部雙層巴士。訪問時,筆者說他們是正宗巴士迷,迷得用近4萬去廢車場買退役巴士,再月花2千多去錦田租地擺車,但他們一聽到個「迷」字卻異口同聲表現反感,因為在他們心目中,巴士迷是指那些坐在巴士司機位隔籬會「郁手郁腳」扮駕巴士,甚至在街邊會追巴士影相的人,他們再三強調,自己是喜愛巴士的古董收藏家或是愛集體回憶的人,跟「巴士癡漢」、「巴士龍友」完全絕緣!

getimage2

自購雙層巴

見到Tony和阿棋,筆者最關心是他們用乜途徑買巴士?Tony:「九巴巴士一般用17年就會退役,退役巴士會運返廠,可能會做訓練車,有o的會賣去外地,絕大部分會運去放車場當爛鐵賣。」阿棋:「所以有心買車,可以試o下去專收巴士既車場,好似錦田大聯、凹頭元興呢類放車場就好易搵到。另外,留意九巴網頁,佢o地儲夠一批舊巴士就會搞標書拍賣,仲會標明車牌同出廠年份,但就全部暗盤落價。」

現實中,雖然買了退役巴士冇可能再出牌,但就如很多左車太跑車的車主般,可間中掛試車牌(俗稱T牌)行街,總算可以過o下癮。以雙層巴士為例,最高載客量除司機外,T牌最多載4人(私家車只可載2人),而要駕雙層巴士,就必須有9號和10號巴士牌,Tony和阿棋年紀輕輕已取得,實在是為玩巴士而早有準備。

getimage3

由細鍾意到大

每個車迷都會有1部dream car,而且大部分是跑車,但筆者奇怪,為甚麼廿來歲的o靚仔dream car不是拉利、林寶,相反竟是最大眾化的巴士。「由細到大,巴士畀到我好大安全感,真正開始鍾意巴士係因為呢部O305,當年佢超勁,係第1款打破非英聯邦國家生產而o係香港行街既德國巴士,第一款巴士車籠有風機⋯⋯,我為o左佢可以放假搭68X由元朗總站搭到佐敦總站,再由佐敦搭返元朗。」身形略胖的Tony興奮地說。

「我唔同Tony,我細個絕對唔鍾意巴士,不過身邊個個同學都鍾意,儲夠零用錢佢o地就會去買巴士模型,星期六就四圍去揀巴士搭,同佢o地一齊玩,跟o下跟o下就覺得巴士愈來愈正,就咁中毒。」曬得一身古銅色的阿棋說。番查資料,O305巴士當年的確威盡,更加因為速度太快,而破紀錄成為首款九巴在屯門公路被影快相,絕非浪得虛名!

整車找爆頭

可以養到部退役巴士健健康康,筆者認為是一件創舉,因為玩巴士除了錢之外,更需要二世祖玩一世車都不會有的耐性及心機。去得廢車場買巴士,部車絕對有問題,引擎、波箱冇樣精神,要執靚佢有排搞。「整巴士好麻煩,我o地初頭冇技術,但想整好佢都要厚住面皮四圍問。問巴士公司實冇人睬你,惟有去問o的專整旅遊巴既車房。不過機器都話仲有得整,但車身霉爛就冇得搞,好似我之前泊露天停車場俾人爆玻璃,配唔番就惟有買膠片DIY,上下層爛o左門板就買番差唔多色貼番上去。」本身在機電工程署打工的Tony和在機場做飛機簡單維修的阿棋,玩巴士年資超過3年,每逢星期六、日都例必返錦田整車,對古董巴士認識,隨時勁過現役九巴維修人員。

getimage4

出車要睇路

唔好以為買到巴士私人珍藏,掛個試車牌就可以周圍去,因為巴士類車種唔理係咪做生意,都受交通條例限制,好多路都唔准行。所以Tony和阿棋每次出車都例必要睇定條路有冇巴士行,好似上山頂呢類斜度高兼且路邊種滿大樹的地方,成4米幾高的O305上去會鏟爛樹。但去唔到唔表示唔好玩,好似佢o地間中都會駕部車行o下元朗大馬路,扮o下巴士司機埋站落客,滿足感超大。每當遇到駕九巴駕足幾十年的司機,更必定會認得佢o地呢款車,車長更會主動同司機打招呼,眼看Tony和阿棋那出於自然的燦爛笑容,就會明白玩雙層巴士有幾大吸引力。

若然有日你在元朗、屯門、錦田一帶油站入油,見到身邊有部巨型O305雙層巴士同你齊齊排隊,大概他就是Tony或阿棋。

getimage5

Keep住回憶

坐過Tony部雙層巴士,心情前所未有舒泰,坐司機位隔籬開盡車窗,雖然俾風吹到筆者這類已習慣冷氣巴的人暈暈o地,但坐車時卻一次過勾起唔少回憶,像是第1次返中學1個人迫巴士,第1次坐巴士見到夢中情人,比坐一部最新拉利599還有價值100倍以上,可能就正如Tony和阿棋話齋,keep住1部雙層巴士等同可以keep住回憶⋯⋯

getimage6

M-Benz O305 bus
Spec.
生產年期:1967-1987
引擎:11,413c.c.直六柴油引擎
馬力:243ps
扭力:85.0kgm/1,500rpm
傳動:3前速自動波
現時易手價:
$25,000-$50,000


參考資料:ioo5

延伸閱讀:

2008年6月3日壹本便利: 車 人 一 句: 0靚 仔 私 玩 80’s 雙 層 巴
2004年8月3日瘋狂巴士迷買真巴士遊車河
hkitalk:ME37@公開活動
hkitalk:2006年的九巴BL79及ME37