本文是網主於2016年9月於本網外地巴士FB群組裡的貼文，轉眼間已三年多但相信曼谷巴士改變應該不大。後來也見過旅遊網站介紹曼谷坐巴士及船的方法，人家寫得較專業，本文算是個感受分享吧。
呢兩日喺曼谷一人旅行，決定去坐一程成日見但無機會坐嘅曼谷舊式巴士。
勝利紀念碑站有架空行人天橋，可以一次過睇晒兩邊馬路嘅巴士，發覺好多都改用咗來自中國嘅「空調」巴士，例如圖中部份鮮黃色及車頂冷氣機好大部嘅。有啲係有乘客開番啲細窗所以我估車內未必好涼。正中間黃色嗰部應該係來自新加坡嘅Benz O305空調巴士，經過大維修後成為曼谷巴士業一員。
當日喺勝利紀念碑站睇巴士，見到有部92號巴士停喺度等客，似係總站，車頭導航位又無人坐，就求其走上去，92號去邊都係上咗車之後再Google先至知，不過其實無所謂，坐錯咗去唔知邊度就落車再叫的士或uber返市中心，其實亦好方便。
臨上車前影嘅合照，最後上咗右邊嗰部藍色長身Hino，日後有機會要試下左邊嗰類短車，更加Local。
喺曼谷坐巴士，無想像中嘅複雜，上車坐低就有阿姐埋嚟收錢，言語不通唔知幾錢無所謂，唔駛開口，放晒啲散紙喺手由得佢收到夠，睇落大約係五至十匹左右（睇番張飛原來係9匹），即係港幣一至兩蚊，仲有張飛俾你，跟住可以慢慢享受旅程。
呢部Hino車齡不詳，但行起都唔係無力，加上92行經嘅路唔少都無塞車，快起上嚟都有啲料到。92其實幾好坐，唔太塞車所以都唔算熱。
至於部車行到幾快，我真係唔知，因為司機位個速度計用咗嚟放爆谷! 司機悠閒地等閒拎一粒嚟食，至於有無超速佢大概都唔會知。
堂軚好高，又或者係司機特登較低咗張椅，見佢都揸得唔太辛苦，但唔好以為會hea做，中間曾經因為佢中線cut慢線，慢線私家車唔讓，老馬著火即刻俾大油挨埋私家車度，真係俾佢嚇一嚇。
車頭第一個位放滿雜物，唯有坐後一個位。
前置引擎，感覺有點像三菱Rosa小巴。
最後我發覺92號坐咗一個鐘後仍然未到總站，唔知坐到幾時，距離市中心越來越遠，唯有喺The Mall商場落車。
由於塞車，好耐都未埋到站，司機提早開門落車，拿拿聲補影番幾張。
落車後偶然發現商場後面有碼頭，坐船返Central World附近、著名食紅錄海南雞飯旁邊嘅碼頭只係半個鐘，船飛大約10-20匹，坐嘅都係本地人，幾有趣！唯獨留意上落船要好快手，有時見過啲分站碼頭無乜人上落架船未停晒個客就跳上岸/跳落船，坐慣坐熟，身手敏捷。
坐船時大約五點半，半個鐘後近落船時已開始天黑。
我覺得船及巴士都好貼近曼谷人嘅生活，大家有機會可以試下。
全文完
