本文轉載自Ka Ho Ng於2015年12月14日的貼文及相片,謹此致謝。


上回講到坐列支敦士登嘅MAN Lion’s City DD(按此瀏覽)。其中列支敦士登嘅12號巴士線,終點站係瑞士邊境嘅Buchs。

之前聞說瑞士postauto嘅雙層Centroliner會在此出沒,但網上嘅資料好少,亦唔知道批車退役未。但知道批車多數喺瑞士嘅St Gallen canton,所以就去Buchs碰吓運氣。

等咗40分鐘準備離開,突然見到遠處有一熟悉嘅巴士駛至,就是postauto嘅Centroliner!於是決定不知就裡地上車,其實架車去邊我都完全唔知,但這就是遊車河嘅樂趣吧。

此車行走790線,前往一個叫Nesslau嘅地方。起初以為呢條係鎮裡面嘅流水線,點知,架車行行吓突然跑山路,其中仲有1:8嘅斜路、髮夾彎、有如嶼南路嘅山路,仲穿越好多個山谷中嘅瑞士山區小鎮,風景之美令人驚嘆。

此Neoplan,我估計用Benz或者MAN引擎,感覺同香港嘅好唔同。用Voith波箱,並設有手動減速器。唯一同香港相似嘅係停車會打冷震。

坐咗1小時20分鐘,承惠100港元左右。沿途見到有3部對頭車係Centroliner,其餘嘅係Citaro同埋Setra。師傅話呢個山區有6-7部Centroliner,全個瑞士都係得20部左右。下年,就會有來自英倫嘅新車,係咩新車,大家心中有數吧。

圖片集:

在Buchs火車站稍為休息,便要開始爬山嘅旅程。

瑞士嘅Neoplan,背景係列支敦士登嘅山脈。

雙樓梯設計,尾樓梯都幾慳位,但缺點係十分筆直。

尾樓梯後嘅座位。

下層車尾只設有4個座位。

這幅圖可以清楚睇到尾樓梯嘅設計,直通下層尾門。

沿途風光如畫,睇得風景嚟又感受唔到架車。

經過狹窄嘅山路,有啲嶼南嘅感覺。回程我未能坐到雙層,只能坐到Citaro。影完呢張相,左邊位乘客都好好人,讓咗佢個位俾我。自駕有自駕嘅自由,但坐車亦有坐車嘅舒服,各有各好。

有啲似新城嘅報站,並會準確預告仲有幾耐去到之後嘅車站。

上層向後望,留意圓角嘅窗框。燈罩同香港次批嘅Neoplan一樣。

終點站,位於山區嘅Nesslau小鎮。

Centroliner突然出現,令我為之一振。

車尾同香港嘅都幾唔同。

下層設有導航位,但樓梯前不設座位。留意樓梯嘅方向,同香港相反。

座位都幾舒適,窗戶係雙層玻璃設計,適合山區寒冷嘅天氣。

座椅旁設有暖氣裝置。下層只有一邊有一條無間斷光管。

上層設有天窗,採光一流。 

途中穿越多個山區嘅小鎮。

下層車廂,除了輪椅位嘅摺椅外,不設低地台區域座位。

坐吓導航位,欣賞師傅嘅超卓駕駛技術。相比之下,新巴派Centroliner行27都係濕濕碎。師傅話下年就有英國嘅新巴士,要試呢批Centroliner就要快手。

後記:

按2017年12月Ka Ho的貼文,這些Centroliner已被相中較近鏡頭的ADL E500取代。相片轉載自autobusse.startbilder.de網站。

全文完