珍惜字軌新車VA55的中巴111師傅

1922

(本文轉載自Simon Lee於本網FB群組的貼文,謹此致謝。)

東鐵過海,諗起呢條隧巴大線111,又諗起舊朋友。

喺手機搵番呢張翻拍相片,當時VA55夜更係屋企人多年相識的朋友,也是我朋友。師傅當時服務態度良好,文質彬彬有禮,也介紹其他港澳碼頭路線司機俾我識,令我玩巴士都玩得有樂趣。佢對當時影巴士的巴迷都非常客氣,會友善微笑,啱傾嘅會傾偈交流。

當晚坐師傅車影相,臨開車前,師傅話想和佢心愛的字軌留影,我都即刻「爆閃光燈」幫手。師傅說佢由DL20換入VA55後,每晚自動請纓攞去洗車機洗車,佢話公司俾架咁靚嘅車俾佢,佢作為員工很開心,想揸架靚仔嘅車做生意。佢成日苦笑111雖然係十分惡跑的路線,又多客又少行車時間,不過佢都好開心有時工作會有佢嘅趣味,唯有自我調節。

今時今日,好懷念呢啲咁深厚嘅人情味。

相關討論:

  • 以前好多中巴司機真係當架字軌車係自己車咁,例如有啲會日日洗隔塵網(車房唔會日日洗),所以特別凍。同埋佢地放大假交低架車俾士啤司機替假,放完假返嚟通常都會好肉赤咁話啲士啤司機唔錫車,揸到架車散晒。
    • Simon:尤其晨早過海線工半車,班司機當架車係寶貝咁,炒花撞凹都肉赤。
      以前啲晨早過海線,車廂好多佈置、物件都有巴迷用心佈置。
    • 過海工半車司機、504/537嗰啲S組司機就更加係啦,因為架車真係佢一個人揸晒無分早夜更,如果架車日修大驗拎架士啤車都會周身唔聚財(當然你做黃廠拎咗LA13呢啲虧到唔虧嘅極品就真係只有講句唔好彩)。後來S組車逢紅日要交俾隧道線,星期一接返架車嗰陣啲司機又會鬧一餐,而且又要校過晒個司機位同鏡。
  • 不明九記都係固定派車,但好似冇中巴咁多故仔聽
    • 其實都有九巴掛牌司機會幫自己架車加工,例如舦環加厚墊、門掣套軟膠喉等。
    • 以前仲有d兩味師傅,中段tup 車期間會抹司機位,感覺架車有唔妥,除左填表俾款待處,仲會自己踩去工程部同大偈或科文講,好多隧巴師傅或大兩味都好錫自己架掛牌車
Previous article黑勢力盤踞中巴站頭 | 1992年壹週刊報導
Next article中巴港澳碼頭的特別打仗車:短珍寶SF19與「魔鬼」師傅