昔日中巴的常規通宵線 – N8、N121、N122、N680及N691

（本文轉載自Simon Lee於本網FB群組的貼文，謹此致謝。）

昔日中巴時代，N8、N121及N122由柴廠派車，而N680及N691則由黃廠派車，用車則由字軌司機隨意抽車。

中巴派更部角色

派更部會了解如果字軌車行左通宵線，會看看是否回得切車，如果唔得會俾後備冷馬（如柴廠的DA25，DA69，VA22，VA26，VA39，VA57，VA63及VA64）。此外，雖然司機原則上任囉車，但派更部會建議司機盡量囉第二日需要日修的車。

於跑馬地星期三跑夜馬時，N121及N122各三部字軌均要做101R及102R，然後才空車回港島做回N車。

特別的中巴N122三車師傅

值得一提，當時N122中巴三車的師傅也是較特別的通宵線司機：

1. 唯一一位穿冷馬制服打領帶通宵司機（通宵車好多司機只穿熱狗polo tee)，仲染左一頭啡髮，而且更電攣左，外表也頗前衛。
2. 搞牌一定齊整。
3. 只取新車，中巴時代先取一代VA、二代VA，後期只囉銀豪，而且呢個喜好仲伸延到去到新巴，在新巴初期，當好多司機還喜歡囉DA/VA/LA，呢位司機一定囉trident。到買左都普殻trident又只囉呢款，超級富豪亦是；之後新巴裝m channel電視，佢囉有電視機的巴士。

人工比日間司機高？

中巴通宵線司機基本上是一工無零，即八個鐘基本工時，但中巴會特別安排「雙計」，即是司機的基本工作時間當雙倍計，以N121/N122為例，全晚工時為大約六個鐘，中巴會當作員工十二小時工作，即一工四點處理，福利相當不錯。

相關討論

N線派車

• 其實以前黃廠還好 都有唔少工半線 可以夜晚出嚟行通宵，柴廠以前應該唔太多冷馬行工半， 焗住多用後備
  • Simon：當時N121、N122班司機咩野冷氣車都囉，通常見車囉車，成日囉102、111、112、106、116的字軌車，也試過囉23或者780的字軌。
• 會否比較少拎LA, 似終VA 輕軚咁多
  • Simon：說對了，當時LA極少行N線，因為司機們喜歡VA，尤其是VA1-30果批。而其次受歡迎是DA1-56果批，偶然會囉DA57-82果批。不過，文中提及的N122三車就只囉新車。
• 記得試過有一晚(應該大概97年尾/98年頭，因為港運城商場97年先開)十一點幾喺港運城出面，見到成堆中巴冷馬行8號尾轉，兩三架拖住卡咩車都有，最記得有當時已調去西環廠嘅DA33，仲有架DC，唔只係日間線收工車定預備行N8
  • Simon：8號部分字軌間中都俾N8班司機抽來用，通常抽架DA75及VA48居多，始終VA及DA較受通宵司機歡迎。

熱狗年代用車

• 請問中巴121,122熱狗年代通常用乜車?
  • 全非空調巴士時代，見過121，122用DL, ML居多，也是來自102，112，106，111，116等過海線
• 未有8達通年代，點做到免費過車轉乘?
  • 兩線既互轉乘客喺紅隧站落車轉另一線時需要由站長或稽查看守下安排乘客轉另一條路線，方可享有優惠，而喺大節日期間既日子中，因為人多既關係而會暫停，而兩條路線多數都會喺紅隧「碰面」，方便快捷地令乘客得到轉乘優惠
    直到2007年4月2號起，改為由同一張八達通卡乘搭兩組路線方可享用優惠

中巴舊VA與新VA

• 相信VA31-50都係搶手貨, 好力起步快
  • Simon：由於柴廠當時有大量VA31-50，基本上各柴廠通宵線一定會有，但司機較喜歡VA1-30，因為呢批車起步更爽，而且中門更暢順，VA31-50關中門速度比VA1-30慢少許，對於「分秒必爭」的通宵線，會無咁爽快。
• 對, 當年中記紅隧某線用頭批 VA 的, 某車長有日向我說: 車務問佢條線想唔想換銀 VA, 車長心思思想換新車, 我說唔好!!! 因為舊呢批 VA 用康偈, 起步快又跑得快, 冷氣又有得較大細, 又凍又靜, 銀VA 冷氣用6扇好嘈, 開尾閘拉手掣先開到, 閂實度門先可以鬆手掣開車, 舊 VA 唔洗拉手掣可以開關門掣, 所以我極力叫佢條線唔好換銀 VA!! 好彩最後無換
  • Simon：銀豪唔駛拉手掣開中門，開完中門唔拉手掣踩實逼力都可以，但就唔可以太心急開車，否則中門會彈番開。
    情況等於307，一車由95年到中巴結束都是VA12，字軌師傅十分喜歡呢批VA，又快又爽。

晨早線中巴司機的特色回憶

• VA12游師傅正呀
  • Simon：昔日中巴307，4班車都很正！一車VA12燦哥及第二班車112七車VA36釗哥均是人車合一，二車LA8/VA25熙哥是最友善及有禮，三車DA26/LA12/LA6光哥手車都很正！以前中巴307十分受乘客歡迎，四班車都很多熟客。
• 朝早班過海返工客識揀車搭架, 醒目識搭梗係坐中巴啦, 如果你知朝早紅隧線:300, 303, 337, 348… 呢幾幾線搭中記同搭九記就知發生咩大事!! 有咩分別!! 303@LA3 唔係紅隧, 但一定要知咩事, haha….
  • Simon：當中最明顯是348/948，班客識貨揀VA13煥哥，以前348煥哥會睇情況改行彌敦道避開渡船街天橋塞車。到轉左948，VA13在青葵公路及西九龍快速公路完全所向無敵。
    LA3來哥，馬鞍山未來戰士，經典的人車合一配搭
    同線敦哥架VA11都好坐，冷氣又夠凍。
• 仲有348@VA13 開遲過九記班348, 煥哥去到加士居道天橋就一路靠右行快線, 去到黃格仔 cut 上巴士線, 而九記班348@AD!! 就會響加士居道落橋後靠左 cut 去慢線, 慢慢用安全車速 cut 到最左慢線入巴士線!! 仲有中記班卡佬好有 term work, 在加士居道, 紅隧口附近, 每當有自己車駛埋嚟想 cut 線, 就盡量比佢地入, 好好架
  來哥班 303 唔停灣仔警署站, 會直飛去到六國酒店停比班客落車
  • Simon：以前中巴的確有很多回憶，唔止巴迷，還有乘客。仍記起307二車LA8/VA25，熙哥和乘客互相問好，乘客和司機的距離很近，像朋友一樣互相問好。
    提起來哥，佢很長時間是DA31字軌，有段時間是披上Olympus廣告，到97年尾才換入LA3，感覺像LA呢類盤呔較實，配上Alexander RH型車身的流線，才襯來哥的強勁駕駛技術