（本文及相片轉載自Simon Lee於2023年6月在本網FB群組的貼文，謹此致謝。)
搵新巴舊相時搵番99年中喺紅隧口影到當時新巴111七車字軌1011的相片，睇到師傅十分開心揮手打招呼，回想起呢位中巴老前輩 – 和尚師傅。
我喺98年喺港澳碼頭影中巴時，就認識咗呢位綽號和尚的黃師傅。當時見到VA46返到嚟總站，師傅見我影相喺111站坑主動停低俾我影相。我影完後走去同師傅講聲唔該，師傅好熱情及客氣話唔駛客氣，佢仲話見巴士迷影相如果方便的都會停一停等佢哋影相。
和尚師傅習慣右手托窗，左手單手揸車，喺網主嘅網站搵到呢張由大暉拍攝嘅相就清楚睇到：
我同師傅交談時佢透露70年代已是111字軌，仲話111咁多年都幫中巴搵錢，咩嘢新車落地都俾111，佢話89年新買DL時全線落晒字軌十分威水，到96年就大幅度幫111加冷，成條線正字軌只有三架熱狗，七架冷馬。
師傅也透露自己姓黃，喺中巴花名叫和尚。和尚師傅十分熱情，佢也分享自己加盟新巴時也做多幾年可以退休，仲話自己個仔已經事業有成，仲生左個孫俾佢抱孫，不過佢話鍾意做嘢消磨時間，所以會過檔新巴繼續揸巴士。
之後日子我喺港澳碼頭影車時，見到和尚師傅都會互相交談，言談間感受到佢雖然是一個長者，但思維卻很精靈，而且身體強壯，冬天也只穿一件薄裇衫揸巴士。
搵新巴相時發現99年中喺紅隧影到佢揸111，佢見到我影相時仲好開心伸手打招呼，回想起當時佢都稍為揸慢少少俾我影車。
都冇見和尚師傅好多年，數數手指佢的孫仔今日也是一個成年人，也祝福師傅一家人生活愉快，感謝師傅當日的熱情及友善的幫忙讓我影相，同埋佢開心的分享。
按此瀏覽原貼文及回應
全文完
相關文章：
