680線中巴派車的變化及15小時工作的特別字軌

（本文轉載自Simon Lee於本網FB群組的貼文，謹此致謝。）

680喺我心目中真係幾特別嘅一條線，由全冷嘅晨早特別線，到變成平日全日服務，同期兩巴更增設熱狗字軌車。

中巴DA＋MB的奇特字軌車配搭

好有印象中巴用上兩架冷氣車包括DA21及LA22搭兩架MB落字軌，而307三車DA26更喺當時開始直到中巴結束一直由早上到黃昏攝680。

下圖：經常於104及105隧道線出現的MB，其中兩部被派往行走680，相信是看中它行走高速公路時速度不錯有關。（大暉攝）

下圖：仍然披著中巴初代空調巴士色彩的DA26。（大暉攝）

喺電腦搵番中巴680一部曾落字軌幾年嘅字軌車LA22相片，LA22大約喺680由晨早特別線改為平日全日服務並改往來往機利文街及利安後落字軌的。而中巴680喺1997年數個月內更曾經是正字軌全冷，但喺1997年8月就突然把LA22換走變為LM10，自此LA22也調去黃廠做士啤車。拍攝時是1996年10月，當時喺利安總站見到LA22，師傅手車好正，高速扭入站十分瀟灑。

680在中巴後期年代晚上班次是全冷，原熱狗字軌如1車LM7，4車DL10及6車DL16均是工半車。只有5車VA20(唯一黃廠車)是有夜更師傅。

下圖：DL16攝於馬鞍山。（大暉攝）

下圖：攝於1997年12月，DM7替680，行駛晚上班次，當晚DM7是臨時安排行走的。

一工七點的680中巴尾車字軌

680喺當時晚上22:50-23:50由港澳碼頭開往利安的班次會變成中九巴梅花間竹開車，當中尾車23:50是中巴黃廠車VA20。

值得一提是680五車VA20是唯一黃廠派車，而680尾班車2350開出班次是由中巴負責，利安尾車則由九巴負責。VA20就是負責行駛尾車，當巴士到達利安後，便會吉車回黃廠，當時為全黃廠最夜收車的字軌，夜班師傅工時達一工七點，即每日15小時，雖然補水很甘，但每日咁踩法真係人都散。

這個全黃廠最夜收車的字軌，於96年初開始出現。基本上，VA20夜更於早上11時左右返工接早更食飯，一轉車後到自己用膳，但之後會接一轉2號，VA20仍然由早班駕駛，直到傍晚才取回VA20，做轉半680（包括尾車2350往利安）才由利安吉回黃廠收工，人工雖高但行程非常辛勞。

首位字軌夜班做左1年多左右就調去691（當時691是筍位）。97年尾換入一頭金髮，外型勇猛的俊哥，俊哥手車很爽，晚上佢開2350尾車入馬鞍山果個單超爽，因為佢要趕著從馬鞍山吉車回黃廠收車。最後俊哥在98年中選擇甩牌，做番柴廠隧巴替位。

VA20早更也行程豐富，早上黃廠吉去港澳做兩轉680，然後夜班接食飯，食完飯後接一轉300，之後再做一轉680就收工，交車給夜班。

早更VA20司機肥叔叔滿哥是黃廠老臣子，一直駕駛40，直到40俾左城巴後，滿哥就不久時間後過檔680，並從果刻開始680就有黃廠字軌。VA20在日間中段需要接300一轉，替300正字軌收車午飯。

下圖：VA20攝於馬鞍山。（大暉攝）

115司機晚上攝680的安排

除了字軌車VA20外，680其餘夜間班次會由115四位夜更師傅(VA16、18、27及29)連人帶車行駛，因為當時115仍是工半線（即是司機駕駛約12小時，路線服務時間由早上六七點至晚上七點多），所以會安排115夜更師傅做680。

VA29是中巴680尾2車，但唔會做尾轉。680最尾果轉是九巴/中巴梅花間竹開車，而且是中巴VA20做港澳尾車，九巴做利安尾車。

當年115班夜班每日行程都幾特別，中午回來先接680一車LM7、三車DA62、四車DL10及六車DL16，一轉車後食飯，再接2仔一轉，然後小休，再接回115四部字軌車VA16、18、27及29做一轉半680，之後好似有兩部要攝8號一個單(唔肯定)才收工。順帶一提，115的VA30字軌沒有夜班，是工半字軌，所以晚上不會過680。

新巴接手680初期都維持這安排，680夜晚會用115批都普躉行走。及後115改為服務至晚上，原115四位夜更調往680，115則從外邊調派司機做夜班字軌。VA20黃廠字軌則維持至99年中，新巴安排Trident(1080-1090)落680，而VA20則甩牌，全線由柴廠派車，VA20由1090取代。

下圖：每晚跑完115後轉跑680的VA18。

LM行觀塘繞道的極速傳說

坐LM行680在觀塘繞道的感覺，至今仍然回味。680中巴頭車LM7，連帶尾車VA20，一頭一尾，兩架車無論師傅及車都很強勁!

下圖：相片應該係中午時間影的，因為揸車司機著冷氣制服，呢段時間680四架字軌包括LM7 DA62 DL10 DL16都係由115夜更負責一轉的。（Boris攝）

下圖：另一張打呔渣680熱狗的相片，LM5攝於北角港運城對開。其中一位司機是比較姿整一點，既gel頭又打呔，外型很chok。（大暉攝）

相關討論

• 何謂工半？ 一工七點又係點計法？
  呢車字軌真係收工都兩三點！不過任何時候總有人搏多幾個錢去做
  • 一工=8小時，一點=1小時；一工七點即是15小時工作；
    工半車即12小時（半工=4小時），一般繁忙時間服務線或晨早特別線其工作時一般為12小時或再多一點，所以該批司機很多時會被稱為工半司機。佢地在中巴年代渣冷馬，一工四點工半補水足，休息時間夠，逢紅休，是頗不錯的。
• 以前工半車是有著數，尤其要調來調去的車。每一次調線，就要預留過鐘時間，以免接不到下一程車。大部份時間，司機是能在指定時間完成，這樣就會賺了現在叫stand by的時間做休息。而這些休息時間往往有半小時。此外，工半除食飯還會有休息，所以，要不停搞牌的工半比起原線工半更著數。
  • Simon：以前307一車及二車，很多私牌接線間場，正正就是師兄說的情況，師傅休息時間也很足夠，很好做。
    常規線如111，得1小時行車時間，路面又擠塞，非常惡跑，當時就算全線有8架冷馬共16個字軌，也不是筍盤。以前港澳碼頭站，常規線最筍是691，行車時間足夠，路面除左中區及灣仔區外會繁忙一點，基本上很好行（尤其是將軍澳路段是很暢通），又有一工四點，非常不錯！
• 680平日有晨早線的中午至下午黃昏攝車，由中午至黃昏已經有303一車LA3攝車，黃昏時間303二車VA11也會攝680，而307三車LA6亦會由下午至黃昏攝680。
• 680中巴轉全冷後，俾市民投訴迫人坐冷氣車，所以換返LM，同期九巴都有S3N掛牌。
  • Simon：當時好深刻印象喺90年代報紙投訴板，每個月總會有專題講巴士投訴，幾乎每次都有讀者投訴太多冷氣車逼人搭貴車，而涉及嘅以九巴居多。
    最搞笑係1995年有集城市論壇，果集講巴士服務。有個當時十幾歲嘅少年揸咪向出席的時任九巴策劃及發展部主管梁耀南提出多項質詢，當中更質疑九巴大幅增加冷氣巴數目是逼市民搭貴車，此話一出全場好多長者拍手歡呼。
• 記得大概97/98年某日去完馬鞍山探親，回程搭680竟然畀我坐番中架LA22，仲記得當時架車已經甩咗廣告翻油咗中巴色，跑觀塘繞道仍然好爽好正
  • Simon：你喺97年8月開始至98年搭到LA22的話就係黃廠替車了，因為97年8月LA22比LM10取代咗，LA22調咗去黃廠做士啤車。
    你果日可能坐到LA22替黃廠正字軌VA20，又有可能坐到替303一車LA3或者替307三車LA12。
• 搭過MB矇丙⋯慢過豬油膏
  • Simon：MB避震軟熟，張凳的背墊及座墊又厚又舒服。加速雖然慢但踩順左都有接近80公里，以前坐MB行114/914都幾好坐。如果搭680，梗係揀LM或者坐冷氣車。