（本文及相片轉載自Simon Lee於2022年5月在本網FB群組的貼文，謹此致謝。)
見左114/914咁多年，個人覺得114多姿多彩好多，九巴四架S3BL/AV上晒好靚仔廣告，中巴平日中午會派冷氣車，夜晚會用4號的LV做尾轉，假期仲會用黃廠冷氣車。去到1997年4月，仲突然放AL1、AL2、DL1落字軌。而且路線設計去程是特快模式，回程是104/105輔助，我覺得好特別。
雖然914開線頭半年用齊AL1、AL2、DL1、DL2四大樣板做字軌，但卻冇咗114的攝車特別安排，用車花款較少。而且914路線設計也很迂迴，又途經大量塞車熱點。當時偶然見到中巴會搵替車行914，都會去影吓的。咁啱97年8月某日五車DL2冇出，就左8號架DL3嚟替。果晚夜更「董氏大哥」見我曝光，即刻自動拉前架車俾我影，呢啲咁開心人情味而家搵唔返。
提起914的司機，當時四車AL2及五車DL2夜更係兩兄弟，佢地姓董的，我稱呼佢地做董氏兄弟，AL2係細佬，DL2係大哥。兩兄弟當時見巴迷影相會好開心，極熱情主動拉前架車(因為深水埗碼頭係單坑)俾人影相。
當時HKBDB都有板友分享和佢地吹水的趣事，同埋佢地手車好勁抽，最記董氏細佬揸AL2西隧踩爆架車80公里，真係好正。董氏大佬話DL2得35咪(即56公里)，慢過細佬架AL2，佢果晚揸架DL3即刻生猛晒，話架車踩到45咪(即72公里)，興奮到不得了。
董氏大佬喺一個月後有日就揸左架LM8行914，佢果晚興奮到暈，仲叫我落嚟影車兼坐車，喺西隧踩爆開85公里真係好正。
呢啲歡樂時光今時今日搵唔返lu，尤其係和前線人工的人情味及人與人之間嘅關係。
相關文章
全文完
