（本文及相片轉載自Simon Lee於本網FB群組的貼文，謹此致謝。）
昔日的人情味是令人懷念的、回味的及珍貴的。
1997年初喺荔枝角總站影車時，識咗當時中巴105一位資深司機潘師傅，佢是VA17早更，綽號魚蛋仔。當時魚蛋仔和普遍中巴司機一樣會主動撩巴迷傾偈（或許是當時人與人之間關係比較輕鬆），佢仲同我分享佢揸105的趣事，仲話公司喺舊年年尾（1996年12月）俾架冷氣車佢，佢都話好開心，不過公司冇派冷氣車裇衫俾佢，唔知會唔會最終甩左架字軌車。魚蛋仔仲提過佢嚟緊會轉905，希望仲有得揸番VA17，佢話架車冷氣凍又好好揸。
到咗1997年5月，105已經變咗905，我去荔枝角影905，就再遇到魚蛋仔及VA17，佢見到我即刻邀請我上車「涼冷氣」，佢今次攞到冷氣裇衫及領呔，仲話套衫好靚，佢會每日著整齊制服去服務乘客（佢服務態度係好好的），當時佢仲笑笑口話自己唔識打呔，條呔係叫個仔幫手打好俾佢。
往後日子都有間中坐佢車，同佢有講有笑。最記得1997年11月學校秋季旅行，當日是地理老師安排全班唔跟大隊去石澳旅行（加個半鐘地理考察），我企喺欽州街站諗住搭102去筲箕灣會合老師同學，就見到魚蛋仔揸架ML24，佢開門見到我即刻撩我上車，佢知道我去筲箕灣，仲叫我坐佢車去中環轉車仲快。我二話不說上佢車，佢話架VA17年驗，西環廠冇車，905正字軌驗車一定以熱代冷，不過佢話秋涼天揸熱狗都可以接受，況且每日中午接一轉2A揸熱狗都係咁。
到1998年2月中巴被宣布終止專營權，我喺1998年5月喺灣仔碼頭再遇到魚蛋仔，佢都同我講很無奈做咗咁多年的公司將會結束，但也接受現實希望將來工作安安穩穩讓佢養妻活兒。另外佢提出想我幫佢和佢架字軌VA17影一輯相留念，讓佢緬懷喺中巴工作歲月，佢架性能良好的VA17，與及呢套佢覺得好靚嘅中巴冷氣車制服。最後都約咗喺1998年7月尾喺荔枝角影咗幾張相，佢好開心，仲搵埋後車ML40的字軌一齊合照。魚蛋仔話佢揸左105/905咁耐，又揸埋冷氣車，好鍾意呢條線、呢架VA17與及中巴。
最近用film scanner重新掃描舊底片，搵番呢啲珍貴相片，諗起好多昔日美好回憶，也懷念當時人情味很深的年代。我都沒有再留意香港巴士很多年，亦都冇見魚蛋仔好多年，相信佢都喺新巴退咗休享緊福。也祝福呢位當日十分熱情、為人友善、敬業樂業的前輩和家人生活愉快，幸福快樂。
相關討論及Simon的回覆：
- 魚蛋仔退休了，記得佢大熱天時都著風褸。隨著905搬去灣仔北無耐就退休了，大約2015年左右啦
- 中巴啲車好睇，中巴啲人情味就更好睇!
以前嗰種人情味丶彈性處理巴士事務，絕對唔係而家啲公司嘅制度可以相比。
唔係話九巴以前冇人情味，不過中巴師傅d故仔好睇d- Simon：謝謝師兄的共鳴
我以前玩巴士，無論中巴、九巴及城巴都有好多開心回憶，當中是當時人與人之間相處的感覺，以前司機及乘客/巴迷是距離很近很互相尊重。另外，我也深深體會到「無人完美」，中巴、九巴及城巴也有其優點、缺點。更加懂得欣賞佢哋優點，但了解佢哋的缺點，咁樣玩巴士會更開心。
- Simon：謝謝師兄的共鳴
- 感謝師兄分享非常精彩的故事！我哋呢啲巴士迷，除咗影車之外，如果有加入呢啲人情味入去，相片就會有熱情和溫度。
- Simon：謝謝共鳴，我也很開心可以分享昔日的回憶，尤其是人情味及人與人之間的關懷、尊重及互動。
- 此車起步特慢
- Simon：VA17喺中巴105/905時表現唔錯，不過同線的字軌車VA28比佢更好。
相關文章：
