（本文轉載自Simon Lee於本網FB群組的貼文，謹此致謝。）
從一眾港澳碼頭站頭司機得悉，SF19曾經是港澳碼頭一部特別的打仗車，有一段時間是由一位綽號「魔鬼」的車房師傅早上囉來打仗690，然後擺在港澳碼頭備用的一部巴士，邊條線唔夠車或者壞車就靠佢來支援。如果去到下午都無路線要替，部車會由魔鬼師傅渣返廠。
遇上SF19
1997年2月某一晚，SF19剛好被用作頂替臨時壞車的111八車DL23，當晚我在港澳碼頭拍攝大量曝光相片，剛巧就遇到SF19替111八車，即刻開機曝光，先拍攝右邊車身。
兩個鐘後就等佢回來拍攝埋左邊車身，夜更師傅好好人，佢見我影相也突登拉前部車，仲叫後面九車VA33唔好拉前，影完車仲俾我拍攝錶板。
1997年7月，再到訪港澳碼頭時SF19已經上左山頂凌霄閣一間曾經著名歐陸餐廳 – Movenpick Marche廣告。SF19當日也是做番同樣任務，早上一個單690後停在港澳碼頭備用，車頭數字牌也搞做6A0，以識別該車停開作備用。這個SF19打仗車安排一直維持至中巴結束專營為止。
下圖：披上Movenpick Marche廣告的SF19，該餐廳在1997年4月開業，直至2005年1月結束香港業務。拍攝當日下著毛毛雨，天色昏暗，用慢快門拍攝難免手震，所以張相矇左少許。
相關討論
- 即係類似九巴嘅牛雜？
- Simon：部分類似，呢部車本身是車房師傅囉來早上打仗，但完成早上行程後就無渣返廠，擺在港澳碼頭當備用車，邊度斷纜、無車、收車就會立即出動。如果果班車有人無車，架車會俾該線司機。但如果是斷纜，師傅也試過連人帶車打仗，但只會做一至兩轉。
- 魔鬼之前喺港澳碼頭嘅駐站後備車是DM11
- Simon：終於明白點解以前有人影到DM11行690相片，原來之前是魔鬼專車。
- 魔鬼是駐站大偈！打完仗係港澳站開工！新城冇派師傅駐站了！九巴吾知取消左未
- 如果每大總站都駐人，都幾消耗人力，人力成本高，取消都正常
- 其實係好事！因為如果小問題可以即時維修！不用返工浪費時間！例如漏水漏油！格力子膠爛咗！舦油！偈油！波箱油吾夠！可以即刻搞！以前大時大節會從車房叫多幾個人去駐站候用！夏天泳季！擺定架工程車係淺水灣候命！中秋晚！中華之寶又上山頂候命的！
- 師傅，以前交易廣場同北角碼頭都長期有工程車泊喺站頭，係俾駐站大偈擺架生，定係候命拖車？另外以前中巴係咪每日都固定有拖車喺九龍區候命？
- 以前交廣有2架工程車長駐，方便出去救車或在站頭維修輕微故障的車。後期只有一架，北角一架，九龍樂富泊一架，交更係紅磡火車站，荔園有大偈駐站的
- 但中巴喺樂富總站無線(只有以前103經樂富)都可以擺工程車？通常派邊部工程車過去？
- 以前年代，兩間公司有偈傾的。九龍係4768
- 唔知魔鬼大偈退休未呢
- 他從中巴過檔新巴做車長，做了一段時間冇做，轉行楂垃圾車。以前車房聚會都有出席，不過已經好多年冇了他的消息了
網主後記：關於「魔鬼」的回憶
Simon提起呢位駐站大偈「魔鬼」，都勾起我細個去港澳碼頭總站影車嘅回憶，佢初期部DM11字軌打仗車，出咗名迫力好靚，揸過嘅司機都讚好，係一掂就有，一般嘅Dennis巴士迫力已經比其他牌子好，呢部係比其他Dennis車更好，質素可想而知。
下圖：印象中新車出牌後已經披上聲寶牌廣告，加上係中巴新車，非常搶眼。（網主攝）
不過部車另一樣出名嘅係車頭水箱好嘈，嘈到坐導航位係傾唔到計嘅程度，有司機講話係魔鬼特登tune過呢部「私家車」，調教到部車個水箱運作得快啲，令車頭司機位無咁熱，若果係真嘅話咁就算係比較個人喜好了。
另外，由於DM11係魔鬼嘅專車，其他司機有需要拎去揸，都會揸得比較小心，加上部車好嘈，所以都唔係個個司機鍾意揸呢部車。
下圖：後來廣告落畫，變返中巴色，仍然經常停喺港澳碼頭。（網主攝）
至於後來換SF19，印象中聽過古仔話部DM新車長期泊喺總站，有高層留意到後，就話咁樣擺太浪費，卒之要拎去落第二條線嘅字軌，而魔鬼就換咗部SF19。至於點解係SF而唔係載客量更多嘅LF，可能係佢朝早要做690，路線要上山，LF未必應付到，所以唯有俾SF吧。另一可能性係快啲上滿客就可以飛站……
全文完
