(本文轉載自Simon Lee於本網FB群組的貼文及網友的回應,謹此致謝。)

今日是清明節,分享一下城巴昔日的過境拜山線。

1997年4月,城巴提供往返大鵬灣華僑墓園的清明重陽特別線,路線會經沙頭角關卡過關,取道鹽田港及鹽梅路前往墓園。當時連接鹽田及深圳東部葵涌的鹽壩高速公路未動工建築,所有前往小梅沙、大鵬灣及南澳的車輛均須行駛比赤柱峽道更狹窄的鹽梅路。

驚險的鹽梅路

據城巴前輩透露,鹽梅路多段路面彎位好窄,一定要過對面線先行到,部分路段是旁邊有坑渠另一邊是懸崖,十分驚險。據333時任掛牌透露,有一年重陽節因為太好生意,搵咗佢架行落馬洲關卡的333行駛,一架12米長利蘭喺一條咁窄嘅路行走,一定好刺激。

城巴喺當時會安排清明及重陽前後的星期六/日及正日提供服務,班次會視乎客量,一般會開2班甚至3班,但3班是極限,因為城巴當時只有每日3個來回沙頭角關卡配額。路線號碼為往大鵬灣的540/542/544,回程為返香港的541/543/545。但如果需求非常高,城巴唯有要安排落馬洲關卡的車行駛額外班次,但由於經皇崗/福田前往大鵬灣相當迂迴,所以是太多乘客買飛時,才會安排落馬洲關卡加班車。

下圖:截圖自2023年Google Map,左邊紅框是沙頭角口岸,右邊的是小梅沙大酒店及大鵬灣華僑墓園,當時沒有高速公路連接,若需由皇崗過關的話路程更會大幅延長。

下圖:文中提及的鹽梅路近海岸邊,是當時連接沙頭角至大鵬灣最主要的道路。

與乘客商討開車時間

呢條路線運作有啲似咗私人租車,司機會先載乘客去小梅沙大酒店,因為城巴會幫乘客預訂祭品,包括燒肉及雞,祭品會喺小梅沙大酒店領取。當乘客取回祭品及去完洗手間,司機會車乘客去大鵬灣墓園拜祭先人,司機會喺到達墓園時會和乘客「開會」,大家會夾定一個共識時間由墓園開車返回小梅沙大酒店食午餐,午餐後會按照正常班次時間開車返香港。

下圖:小梅沙大酒店外觀。

(轉載自http://siumuisha.hotelsofshenzhen.com/cn/)

下圖:近海岸、彎彎曲曲的就是鹽梅路,巴士由左向右駛,於小梅沙大酒店領取祭品,然後前往終點大鵬灣,再於共識時間開車返回小梅沙大酒店午餐。按內地網站報導,小梅沙區正進行大型重建,按地圖位置現時該酒店是個平整了的大型工地。

值得一提,城巴喺1987年至1992年曾經開辦小梅沙大酒店線,當時路線只會在夏天的星期六日及公眾假期行駛,但其後生意欠佳所以停辦,但牌布一直保留小梅沙,剛好城巴喺1994年開辦大鵬灣拜山線,呢格小梅沙牌布就嚟得啱啱好,因為路線會停靠小梅沙大酒店,用小梅沙牌布也算適合。

拜山線派車

城巴的大鵬灣拜山線會取道沙頭角關卡過關,所以當時會安排以下利蘭奧林比安輪流行駛:
180 FC3474 廣東02 00534
181 FB8714 廣東02 02585
182 FC3084 廣東02 00535
188 FC6577 廣東02 02584
197 FD8768 廣東02 00536
201 FD9105 廣東02 00537
202 FD8653 廣東02 00538

下圖:相片攝於1997年4月5日,當日188行駛往返大鵬灣華僑墓園的清明重陽特別線。

相關討論

代訂祭品

  • 代訂祭品,票價包?真有趣
    • Simon:額外訂購,要另俾錢。肉類一般都不能帶過關,所以城巴的安排是幫乘客搵小梅沙大酒店預訂,除咗過關原因外,乘客也冇需帶住盒白切雞或燒肉咁長時間。也有印象訂購祭品是包括埋圓寶蠟燭及金銀衣紙。記憶中永東冇代訂祭品,另外由2001年開始,鹽壩高速公路嘅落成大幅縮短行車時間,而家由沙頭角去大鵬灣墓園大約15-20分鐘就到。

掃墓專線

  •  我記得城巴於1989年重陽節開始攪「掃墓專線」
    • Simon:1989年的小梅沙線是「旅遊專線」,因為當時小梅沙大酒店落成,當地也是著名海灘城市,當時香港人也喜歡喺去小梅沙游水渡假。除咗城巴,當時省港澳也有小梅沙線。
      小梅沙去到92年左右因為客量少所以取消,直到94年左右因為大鵬灣墓園落成有大量港人把先人安放在此重開路線。
  • 見過有相行小梅沙但number係580既,係咪都係拜山線嚟?
    • Simon:580呢個號碼有印象是2000年重陽節時使用,當時城巴喺1998年暑假開始駛革過境線路線號,而580則安排在2000年取代540成為大鵬灣掃墓線,也是城巴大鵬灣線最後服務日。

下圖:九十年代初城巴宣傳過境線的單張,其中一條線就是往小梅沙。

回憶坐城巴包車往內地

  • 91年工作係帶團,做過一個公司包團,行程要去葵涌鎮睇廠,該團指定要用城巴雙層車,過關後條路爛到飛起,未到梅沙已有團友嘔….
    到廠後,架車污糟到不得了,全是泥漿,廠有工人拉水喉冲洗車身,但回程出返去咪又係一身泥漿
    最記得反而係果日係廠附近,果餐午飯有海鮮、燒鵝、乳豬,正到爆!

    • Simon:經典,當時係咪行沙頭角關卡?果條由鹽田去葵涌嘅山路十分爛及窄。如果當時包車要去葵涌一定搵最熟路的前輩,因為城巴一直冇線去大鵬及葵涌果頭。有冇印象果日坐邊架利蘭上去?
    • 唔記得邊架城巴,係過沙頭角關,條路爛到飛起,不斷過「氹」,坐左成3個鐘至到,午餐成點至食。食唔夠一個鐘就收碟,睇廠果時我同其他領隊導遊係會客室食花生,城巴司機一直冇入過嚟,我哋見到窗外有工人噴水洗車。果個年代極少帶團用城巴車,所以同司機唔熟,冇乜兩句。黃昏返到香蜜湖,我哋就落車。第二日回程係坐環島直巴。
    • Simon:城巴一直包車費用唔算平,除非是60人以上租用就好化算。以前經常租城巴是中旅或者美麗華啲團,或者錦倫/連洲旅運搞嘅屋邨團就會租城巴。而當時無線如果返上去拍劇,間中會租城巴,中華電力也是租城巴常客,經常租城巴上深圳的電力公司交流。
      最深刻是城巴老友透露1997-98年期間,城市大學也頗頻密租城巴上廣州華南理工大學做交流,當時5架B12都行勻呢個柯打,好多司機(包括後備)都做過呢單包車。
  • 咁耐我都見過兩次沒有城巴站點的地方出現過城巴,一次就在93年在觀瀾湖高爾夫球場會所外見到有部飛天巴士的利蘭包車,當年還未有梅觀高速。另一次就在常平忘記是那個新樓盤外見到有部城巴利蘭應該是被地產發展商租,應該車香港人上去樓盤睇樓。
    • Simon:觀瀾高爾夫球會喺97年開始就經常租城巴做球會包車,好多司機都識做。喺未有梅觀高速時就行白芒聯檢站,再經龍華上觀瀾。

小梅沙的路況變化

  • 十幾年前去過小梅沙同溪沖一帶,有D似屯門公路,好難想像雙層巴士行「下路」嘅感覺。那年代去深圳東部交通十分不便。
    • Simon:鹽壩高速公路喺2001年通車後,東部交通已經大大改善,不需要再依賴狹窄的鹽梅路。而東部的旅遊景點及酒店也也鹽壩高速通車後陸續落成,該區旅遊業都十分暢旺。
      值得一提,著名食海鮮城市南澳再入少少的海灘小鎮西涌就真係經典,到今日連接西涌的道路仍是極狹窄的道路,但因為西涌海灘風景靚,所以夏天都好多人去,搞到果度大塞車。而環島旅運的南澳線喺2005年之前仍有一班車去西涌,仲會用12米長的Scania入去,坐過一次驚險刺激,司機轉彎時要響鞍提醒對面線啲車要過火位轉彎,好驚險。
  • 細個跟屋企人返溪沖鄉下拜吓山游吓水,未有鹽壩公路,必要行鹽梅路,山路窄車程長盲灣多,但海景真怡人,咩叫海天一色就係咁學識;記得d中港貨車夜晚開哂大灯,每入一隻灣都响响安,遠係沙灘夜晚望上去都見到大灯,霧燈除左死火灯,咩灯都齊,因為無咩街灯,當年望上去果堆懸崖灣,宜家起曬過億臨海別墅,當年入去大小梅沙之前要過二線關;去同回程如撞正假期人潮黎沙灘游水,大小梅沙必塞車,塞返沙頭角,肯定訓幾轉都未到,所以要預時間出同入。
    近年起好鹽壩公路完全兩件事,又快,路又靚。宜家再進化起地鐵8號線,去大小梅沙出年可以搭地鐵,鄉下都國家級速度收地滅村式起地鐵同車廠,發展真係快。

    • Simon:我第一次去小梅沙係1990年暑假跟屋企人去小梅沙大酒店渡假,去程喺羅湖去巴士入去,又凳又拋,坐到人都散。最記得個沙灘超污糟,又多人游水但啲水好多垃圾,沙面又多垃圾。回程屋企人想搭直通巴士,見到城巴張海報我即時雙眼發光,但職員話爆棚,最後搭咗省港澳嘅UD返香港,好過搭羅湖車
      成個東部相信只有西涌仲未重建道路,仍然是超狹窄嘅山路連接西涌村及海灘。
  • 記得當時細個返溪涌會羅湖包的士,(因為紅白藍袋運物資多野,宜家唔洗lu,環境仲好過我地,調返轉接濟我地就差不多 );仲要講好价錢,仲要問識唔識去,有d會誤會左係西涌,講小梅沙過d就穩陣,有d未必去。
    最記得人又多,隊又長;回程會包車到羅湖;以前d 的士係VW Santana,條路由出車開始已經唔靚,到鹽田果邊直情沙塵滾滾,同多氹,不停避氹,一係直衝,拋呀拋,加上d的士seat位嗰時好興會有塊白布冚住成張凳,冷氣又唔夠,真係褲都濕,不過細果當然覺得車程開心刺激,行山路原來係咁。
    之後鹽壩高速起好,就去上水搭車去沙頭角過,快好多好多,記得covid前返去,試過真係連過埋關返到香港屋企唔洗一個鐘,同以前可能半日差好遠。
  • 宜家深圳東個起左幾條隧道公路方便好多囉。
    • Simon:以前未有呢堆高速,由深圳市中心或者沙頭角去東部真係塞到九彩,最經典是前往深汕高速,未有鹽排高速前一定要經橫崗前往,塞車塞到暈。

為何直通巴士不再用雙層巴士?

  •  真心唔明點解直通巴士唔會再用雙層巴士?
    • Simon:據悉自從城巴喺2001年3月26日離開過境行列後,兩地政府一直未有再審批雙層巴士過境配額。據一位熟悉東洋旅行社的巴迷朋友曾透露,東洋原先想把佢旗下兩架皇牌雙層Scania申請過境配額及出過境牌,但最後不了了之。
      不過事隔17年後,港珠澳金巴的雙層MAN雙層巴士領取過境車牌,終於再有雙層巴士獲發過境牌及配額,但只限行駛港珠澳大橋穿梭巴士。

全文完

相關文章:

城巴中港過境線 – 大批新車加入及開辦大鵬灣、小梅沙新線

Previous article曾停泊於天水圍燒烤場的退役城巴Dennis Trident | 尋找退役巴
Next articleLondon Bus Museum 2022年古典巴士營運日 – 37 Running Day