在1996年尾，正在行走87D往錦英苑方向，當駛至恒康街曾璧山中學巴士站時，失控剷上行人路及巴士站。巴士左邊車頭嚴重損毁，更有一條巴士站上蓋的柱插入巴士下層內。幸好意外中只有6人受傷。
網友William Bear曾在本網Facebook群組裡分享一些當晚的相片及回憶：
又到講古仔嘅時間，呢架掛牌87D的老虎頭發生左交通意外，邊年邊月邊日就唔記得了。
記得我細個嘅時候張書枱望住個窗就係望呢個景，有一晚讀到好夜，見到呢個老虎頭停咗係度好耐，佢之後有警車出現於是唔理三七二十一着件風褸（我冇記錯當日天氣幾凍）揸住部傻瓜機踩住單車就去睇下發生咩事。
因為事隔都有幾個鐘頭，只係剩返工程部喺度執嘢同睇下點樣拖返架車走。當晚睇11點新聞才知道嗰度發生交通意外因為司機不適撞咗埋去巴士站，好彩受傷嘅人都只係輕傷，如果大吉利是喺富安花園嗰個站撞就大鑊好多，原因係恆安邨呢個站已經落咗好多人，而當時附近居民唔多鍾意坐81C，因為佢兜勻成個沙田。
呢架車最後離開咗87D，行走86C直至到退役（有錯請各位指正）。尋晚計算過之後我應該做咗巴士迷25年，影交通意外到而家只係第二次，亦唔希望再有機會影到，原因係唔希望再有交通意外。第二次影交通意外就係一年前嘅年初一喺元朗工業村的反肚AP，嗰日無所事事於是揸咗架車去影，影影下個交通警走埋嚟，佢主動同我講話我地巴士迷仲勤力過啲記者。
網主註：討論區留言提及這位師傅外號叫「短命仔」，因為他的皮膚看起來有點不一樣，有些較為近似白色。
在Youtube裡找到由Ken Fung上載的新聞報導片段，他亦提及意外日期不詳，約是96年11月至翌年2月之間。
片段截圖：
發生意外前的相片：（大暉及子賢攝）
相信是攝於意外及修復後，車身的廣告也消失。（LUN攝）
全文完
