(本文轉載自Simon Lee於2022年5月15日的貼文，謹此致謝。)
東鐵過海今日通車，市民搭車模式相信也會有所改變。
171喺1994年6月開線，由工半時間平日15-25分鐘一班，到增設假日服務20分鐘一班，然後改為全日服務，兩巴也不斷加車加班，之後更開辦通宵線N171及晨早單向特快不經利東及堅拿道西的171P，最後更在2011年早上出九龍方向分拆為171A/171P。另外，我覺得171是九巴第一條深入當時仍是城巴及中巴地頭的鴨脷洲，比具意義。
多年來171系列服務鴨脷洲居民多年，也是當區居民過海首選。值得一提是多年來紅隧線食正早晚繁忙時間的通常是中巴/新巴，尤其是101/102/104/105/106/109/111/112/115/116/呢類接載乘客往港島返工的路線，而171主要乘客是由南區往九龍的返工客，咁啱九巴就食正晒早晚繁忙時間，所以九巴一直重視171，朝早開出的171/171P座無虛席，十分多客。
不過當南港島綫喺2016年12月通車，鴨脷洲過海客大幅流失至南港島綫，我喺南區返工，很多時搭171返放工，睇住朝早出九龍171P得返半滿，171A更加是半車都冇，昔日九巴食正的黃金時段立即變得失色。
相反城巴卻「風水輪流轉」，多客時段對調左方向，早上入南區及黃昏出九龍的171十分旺場，而且呢兩段時間一直是城巴時段。因為很多地產商在2014-2015年開始因應南港島綫將於2016年通車，在黃竹坑建設多座Grade A商業大廈，或者把舊工廈入紙及入則翻新活化成Grade A商業大廈，一時間黃竹坑由工業區變成商廈林立，多間跨國企業把總部遷至黃竹坑Grade A商業大廈，171就因而受惠。
我早上搭171入南區，去到加士居道通常一邊坐晒人，仲有空位坐，但去到紅隧口就一車打爆，而且大把乘客排隊等171，唔會搭兜到七彩的107，因為早繁由紅隧去黃竹坑十五分鐘左右，令171大受歡迎及完全吸收晒紅磡站過海黃竹坑的乘客，放工時間一樣載滿黃竹坑返紅磡站轉車客，當中大部份都在紅磡站落車。
不過當今日東鐵過海通車，聽日開始171仲可唔可以守到紅磡往返黃竹坑呢個最後據地? 真係唔知，但連呢個據地都失埋，作為睇住171發跡及變遷的我，都會感到十分惋惜。
相關討論及Simon的回覆：
- 仲記得當年城巴有人響鴨脷洲“新”邨派傳單宣傳
- Simon：城巴當時真係好進取，記得171開線城巴有個女車長落左字軌，當時仲有雜誌訪問，影住個女車長蹺手戴黑超，背景是架3頭豪搞171牌，好型。
- 171 而家變左非繁客量多過繁時客量，最少太子、旺角仲有客會等先
- Simon：171就做左放假時間南區往返旺角買嘢行街食飯消閒客，不過比起南港島綫通車前差好遠。另外，171都有啲客喺彌敦道至長沙灣道沿線搭去盈暉台、華荔邨及荔欣苑，起碼快過6號。
- 171算係我最熟悉的九巴隧道線之一。
94年開線之初，只有4架車，當中兩架係因為234X因搬入灣景總站，要換ADS而騰出兩架AD，那4名師傅便連人帶車走去171開荒。另外又有一架AD及AL，94年9月換入4架新出牌的AV ，包括GE4577/4660/4861同5513，那4架AV大多是靚車，保養不俗，其後逐步加至9架，最後到15架，全部AV，那是171九巴的輝煌年代，當時有30位掛牌師傅加4位替年，雖然同事之間偶有爭拗，但整體而言還是算融洽，試過有位師傅嫁女，當晚夜更就有8位師傅編休/鋤假/射波，加上返早幾位，剛好一枱，算是171師傅聚餐。
後來車務調動，有意換走AV而換入攀爬力較佳的AD，當時有幾位師傅上5樓吃飯，遇上雷中元吃飯，陳情之後，獲保證不會換車，但此安排卻引起另一班師傅不滿，結果年多後才解禁，當時有部分師傅不想揸AD，不惜換字軌。直至換入DM躉，已經是另一個故事。- Simon：171當時九巴都肯落資源做，未有金車前盡量用新落地AV，最記得之後再加入HA6862 HA437 HJ7145 GY9308，當中HA6862鬍鬚大叔手車好勁。
- 城巴一樣肯落資源做，開綫用 396-400，當時最新的 Volvo
- Simon: 最深刻印象是396，從未上過城巴色。之後加車就加左342、345、348、392，全部上晒廣告，345 幸福傷風素，392 白花油，397 海怡廣場，好靚。345之後換白色西門子，392之後換紫色白花油，348就是Mita 文儀用品
- 171 開綫係神奇嘅，冇諗過南區會有巴士 (+鴨利洲有九巴)去旺角 (170經過小段窩打老道不算)，當然之後 970 更加神奇
- Simon: 171開線果陣我開心到不得了，好記得儲夠來回車錢及一餐麥記即刻遊河，去程搭城巴，回程搭九巴，咁大個仔第一次去海怡半島。171開線頭兩年城巴搵左個女車長落字軌，仲上個雜誌訪問。
- 171我去南區經常會坐，中巴未開970前我由佐敦去香港仔都會坐171去黃竹坑再行過去。有時我由彌敦道去香港仔都可能會坐171，發覺如果紅隧唔塞車，坐171到黃竹坑落車行過香港仔，原來會比坐970X快。
南港島線通車後171班次真是疏落很多，很多客人都改坐港鐵，我留意到171坐彌敦道客人一般都很少，主要是紅隧口到南區一段多人，東鐵到金鐘後171客量應該會進一步下跌，剛剛我也有留意數班104巴士在彌敦道的客量，乘客量暴跌，下層祇有不足五名乘客。- Simon：我試過星期日朝早搭171，當時唔塞車，由旺角去黃竹坑勝利工廠大廈可以25分鐘左右完成。
171鴨脷洲乘客流失左一大部分去南港島綫，減班一定難免，當時171客源已得番黃竹坑返工客，今日打後就真係要觀察一下了。爆棚旺場時間集中喺朝早入南區及黃昏出九龍，呢兩個時段俾城巴食晒。
另外，好多銅鑼灣客都識喺堅拿道西搭117/171返九龍，真係冇112咁逼。
- Simon：我試過星期日朝早搭171，當時唔塞車，由旺角去黃竹坑勝利工廠大廈可以25分鐘左右完成。
全文完
