（本文轉載自Simon Lee於本網FB群組的貼文，謹此致謝。）
表面是一架好普通的Trident巴士，不過呢批當時905字軌車1131-1143卻帶俾我無限回憶。
新巴接手中巴905後，一如佢哋當時策略，把旗下大部分路線（尤其旺場線）加車加班，當中905更由九架字軌（7正2蛇）變成13架全日正字軌，仲要中段時間搵齊305兩架字軌及948三架字軌攝線。當時新巴喺98年10月已經加入四架ML行走，到99年1月更變為全冷，換晒做DA/VA，不過呢四架額外加車未有固定用車。
新巴喺1999年2月左右就立即換入全新1131-1143做字軌車，呢13架字軌當中1131-1140是英國裝嵌，用咗ZF 5HP590波箱（有錯請指正），批車起步加速比同期用voith DIWA863.3波箱明顯快咗。905落呢批車字軌的司機大部分是前中巴舊人，佢哋一換咗呢批車就好開心，因為喺市區路起步快加速快好重要，喺早前文章（1998年新巴Dennis Trident新車的特點、[回憶分享] 新巴Dennis Trident新車表現及路線）提過新巴部份低地台車（包括1131-1140）都是「中巴式車門設定」，頭門行車時可開門，中門唔駛拉手掣開啟而關門速度又快，令到一眾前中巴字軌揸住呢批車好似當中巴咁揸。
當時搭新巴905係好爽快，尤其頭車1131及二車1132，當中早更兩位字軌花名分別叫「天下」及「無敵」，佢哋會爬九巴尾車及尾二車的頭，不過天下無敵同九巴班司機好老友，佢哋爬左人哋頭，返到荔枝角站頭會一齊開玩笑，有時會「郁手郁腳」互相整蠱對方，其實好老友的。
新巴905線唔似其他紅隧線受廣告商垂青，喺當時只有1131及1135上咗廣告，當中1131個念慈菴廣告是由中巴的合約過繼，當時中巴時代念慈菴喺DA73上廣告。
到咗新巴時代DA73仍披著廣告，之後換Trident甩左905，三個月後廣告落咗喺1131，但就換成「青bb版本」廣告，有別於昔日喺中巴的黃色蜜糖感覺傳統廣告。
1135廣告是Templeton鄧普頓，鄧普頓廣告當時喺九巴城巴上左，無論熱狗冷馬都是深藍色襯金色線條，喺新巴時廣告用咗星空奇遇記主角冼樸造型嘅模特兒做廣告主題。最記得90年代中喺HKBDB年代，有板友叫「鄧浦鈍TPT」，仲惡搞咗當時Templeton喺巴士廣告口號，當時板友改篇成「選擇錯誤路線踏上破產之路 鄧浦鈍為你積多成小破壞將來 」…..
相關討論：
- ZF波箱呢批新巴Trident , 表現明顯比Voith好好多 . V 箱版本可能因為用咗細尾牙，不論平路抑或斜路，都好似食咗豬油糕咁，慢到不得了。相反ZF VER 起步爽，加速快，表現超班，特別印象深刻有 #1138， 上柴灣大斜路至少40km/h
- Simon：呢批1131-1140真係好爽，起步加速樣樣都好，當時呢批車行905返九龍方向，過咗西隧站上連翔道果下加速好快好爽，奈何極速70多啲，否則更完美
- ZF 不論 4HP500 定 5HP590，有部分都會變左全液壓咁，俾油就嗌高轉鬆油即刻跌落怠轉，感覺似踩單車 or Allison。記得有 386 VA41 1135 都係咁，至於係專登 tune 成咁定係你個野壞左，就真係要各位師兄解答
- Simon：當時坐905批ZF躉，就有師兄你講嘅感覺，好難忘。坐過佢哋夜晚喺長沙灣道去灣仔，喺冇車段路踩到好快，加速聲及轉波聲帶高音，埋站鬆油就吹梳聲好響亮，好正，然後未停頭門一開招呼乘客上車，中巴上客質感但出現喺新巴新車，呢種感覺好正
- 堆車中年行601都搭唔少 不過表現拍埋電都躉已經比下去。三波躉就中規中舉，孖尾喉都唔錯，當年最強只有12xx
- Simon：批車新車冇得頂，起步加速好爽，可能中期保養問題開始差咗。當年班中巴司機揸到我提過「中巴式開門」的躉，個個就好開心，佢哋話揸市區線或者紅隧隧巴，車門自由門啟，唔駛拉手掣開門好緊要，揸番呢批車佢哋即刻「中巴上身」
- 印象中，新巴trident 車速唔高。坐過矮𧄌行970，喺西隧得65
- Simon：新車時除咗1001-1020/1091-1096只有65外，其餘12米躉極速介乎70-75左右。而11米（14Xx）及10.6米（16XX）均是70-75左右。
- 記得01/02年之後10xx,11xx甩晒904/905,換晒3A黨。
- 後來改水塘前 VA44-46 同埋 48-50 都加入埋
VA37 就俾左 104, VA34 就本身8號, 到JCG Banner 到期先入905 - Simon：因為換車俾18，905變回DA22-DA34，兩個月後再換VA31-VA43。
- 後來改水塘前 VA44-46 同埋 48-50 都加入埋
全文完
相關文章：
