(本文轉載自William Bear於2018年4月的貼文，謹此致謝。)
有一定年紀的巴士迷朋友，應該無邊個唔知必達係咩，今晚再同大家重溫一下20幾年前嘅美好時光。
我第一次認識肥佬劉，就係佢個辦公室，有巴士模型同零件賣，冇記錯應該係火炭某一個工業大廈。跟住同其他兩位巴士迷朋友就開始參加佢嘅活動，佢最經常搞嘅活動就係巴士遊車河。
1995年一個炎熱嘅夏天，約咗喺大學火車站集合，Damiler A遊車河，但最後嚟咗倫敦寶，因為聽講叫呢隻老牛吾醒，但當時倫敦寶仲係用緊英國式車窗，即係開唔到，架車成個焗爐咁熱。
跟住再有參加平頂寶，尖頭寶的游車河活動等等，每次都跟佢返打鼓嶺車場仲唔捨得走。佢最經典嘅路線包括用珍寶行大帽山，紅燈籠行歌連臣角上去石澳，同埋Daimler A去黃石碼頭。
後來因為學習成績不太好，慢慢淡出佢嘅活動，到讀大專嘅時候重新再對巴士有興趣，先至知道最後肥佬劉同佢公司發生乜嘢事（大家要睇吓報紙先至會知）。
今時今日諗返相當感慨，如果佢當時嘅車全部仍然健在，就會係我哋70後80後的美好回憶⋯⋯
參加活動嘅時候，自己好渴望坐上巴士司機位，今時今日都叫做還左這個心願。
聯和墟巴士總站舊址，亦是聯和墟巴士總站現址，1993年。當年有聯和墟巴士總站返去坪輋小弟都係座上客。
西沙公路
用D931去歌連臣角 – 冇錯佢係柴灣迴旋處經環翠邨上歌連臣角道，差唔多上到頂架車唔係好夠力幾驚佢泡鬧，想到歌連臣角道頂迴旋處入石澳
其實當年佢啲展品大部份機器已經大修，架車只係載幾個人，根本對副機器完全冇難度
最後呢兩張相由用傻瓜機影勉強睇到，長牛同九巴倫敦寶其實就係80年代末期退役，運上廣州行左幾年之後退翻落嚟香港，準備買比收買佬拆毁，地點就係而家打鼓嶺郵政局出邊嘅咪錶位。
當年嘅合作協議完成合作之後，架車係要搵返落嚟香港，唔可以留喺大陸，但呢種協議間間公司唔同，所以有部份珍寶同埋新加坡柴留咗喺國內。
小弟啱啱擘大眼起身就見到咁多位踴躍留言真係好開心! 但20幾年之後嘅今日，相信大家有當年的讀緊中小學小小巴膠，變成社會一份子，可能已經擁有家庭，真正的四個碌，當年嘅夢想基本上大部份已經達到⋯⋯包括三大巴士發行商出嘅模型，想買就買（要走私返屋企作別論），好可能唯一仲未達到嘅就應該係古老巴士保育毫無寸進
記得當年巴士公司標售舊車，就好似買二手車咁完整無缺而且仲可以行得，亦都冇咁多規矩。今時今日大部份標售嘅巴士已經俾佢拆到爛晒，好似有心唔俾你地整返郁佢咁，就算咁好彩擁有完整老舊巴士，都要偷偷摩摩，相當令人感慨！
聽到各位講咁多意見真係相當俾面！大家嘅話題好多時都集中喺巴士保育甚至乎汽車博物館，反觀澳洲英國同埋德國，巴士保育叫做做得比較好，除咗為古老巴士有藏身之所之外，亦都有好多義工參與修理嘅工作。除咗收藏之外，仲會久唔久有活動揸出嚟同市民分享歷史回憶，記得德國柏林甚至乎有一條巴士線行走嘅車就係古老巴士。起步較遲嘅國內都開始有汽車保育嘅出現，但要留意絕對冇大家所講嘅政治問題，巴士博物館嘅展品包括捷克同埋日本嘅產品，火車博物館更加有‘各國代表’。
今時今日我哋應該值得反思如果真係要做好交通保育係咪應該要有個牽頭人呢？有咗牽頭人之後應該點樣同政府交涉呢？我哋應該點樣有計劃一步一步推進呢?汽車博物館同交通博物館其實係每位嘅夢想，但係未至於係幻想。
全文完
